அடுத்த நான்கு ஆண்டுகளுக்கு சிறப்பான வகையில் நாட்டை வழிநடத்தி செல்லும் வகையில் குவைத் அரசு ஒரு செயல் திட்டத்தை தாக்கல் செய்துள்ளது. இதன் சிறப்புகள் என்னென்ன? அடுத்தகட்டமாக அந்நாட்டின் வளர்ச்சி எப்படி இருக்கும்? போன்ற கேள்விகளுக்கு விடை தேடலாம் வாருங்கள்.
குவைத் நாட்டில் பிரதமர் அகமது நவாஃப் அல்-அகமது அல்-சபாஹ் தலைமையிலான ஆட்சி நடைபெற்று வருகிறது. ஓராண்டை கடந்த நிலையில் 4 ஆண்டு செயல் திட்டம் ஒன்றை உருவாக்கி, அதனை அந்நாட்டு நாடாளுமன்றத்தில் தாக்கல் செய்துள்ளனர். 2023 முதல் 2027 வரையிலான ஆட்சி காலத்தில் சிறப்பான பொருளாதாரம், நிலையான வளர்ச்சி, சீர்திருத்தங்கள் உள்ளிட்டவற்றை மேற்கொள்ளும் வகையில் செயல் திட்டம் உருவாக்கப்பட்டுள்ளது.
குவைத் அரசின் செயல்திட்டம்
இதில் குறிப்பிடத்தக்க அம்சங்கள் என்னென்ன என்று பார்த்தால், பொது பட்ஜெட் நிலைத்தன்மை, பொருளாதார வளர்ச்சிக்கான வரையறை, புதிய வேலைவாய்ப்புகள் உருவாக்கம், திறன் மேம்பாடு, நிலையான வளர்ச்சி, வலுவான மனித வளம், உற்பத்தி திறன் ஆகியவற்றை சுட்டிக் கடட்டலாம். குவைத் அரசின் செயல் திட்டத்தின் மூலம் பெரு நிறுவனங்களுக்கான வரி குறித்து பொது வரையறைகள் உருவாக்கப்படும் எனக் கூறுகின்றனர்.
வளைகுடா கூட்டுறவு கவுன்சில்
மேலும் உள்கட்டமைப்பு, சுற்றுலா, பொழுதுபோக்கு, சிறு மற்றும் நடுத்தர தொழில்கள், ஓய்வூதிய திட்டங்கள், பொதுத்துறை நிறுவன ஊழியர்களின் சம்பளம் ஆகியவற்றுக்கான நிதி ஆதாரம் குறித்தும் வழிகாட்டப்படும் என்கின்றனர். மேலும் GCC எனப்படும் வளைகுடா கூட்டுறவு கவுன்சில் நாடுகளுக்கு இடையில் ஒருங்கிணைந்த ரயில் வழித்தட இணைப்பு திட்டம், குவைத் கார்கோ சிட்டியின் தொடக்கம் ஆகியவையும் முன்னெடுக்கப்படவுள்ளது.
எண்ணெய் வள ஆதாரம்
குவைத் நாடு எண்ணெய் வளத்தை அடிப்படையாக கொண்டது. இதற்கான இலக்கை நாள் ஒன்றுக்கு 3.15 மில்லியன் பேரல்கள் என உற்பத்தியை அதிகரிக்க அரசு இலக்கு நிர்ணயம் செய்துள்ளது. இதற்கும் புதிய செயல் திட்டம் உதவிகரமாக இருக்கும் என எதிர்பார்க்கப்படுகிறது.
முதலீடுகள் ஈர்ப்பு
இதுதொடர்பாக குவைத் நியூஸ் ஏஜென்சிக்கு (KUNA) பேட்டியளித்த எம்.பி அப்துல் அல்-அன்போயி, குவைத் பொருளாதாரத்தை மேம்படுத்தும் வகையில் முதலீடுகளை தேசியமயமாக்கம் செய்யும் முயற்சி வரவேற்கத்தக்கது. வளர்ச்சி நிதியை வலுவாக கட்டமைப்பதன் மூலம் புதிய வேலைவாய்ப்புகள் உருவாக்கப்படும். எண்ணெய் வளம் அல்லாத துறைகளில் லாபம் அதிகரிக்கும் என்று கூறினார்.