நிலவில் இரண்டாமவராக கால் பதித்த பஸ் அல்ட்ரின் தனது 93ஆவது பிறந்த நாளில் நான்காவது முறை தனது நீண்ட கால காதலியை திருமணம் புரிந்துள்ளார்.
நீல் ஆம்ஸ்ட்ரோங் முதல் முறை நிலவில் கால் பதித்த 1969 அப்பலோ 11 விண்வெளிப் பயணத்தில் அல்ட்ரினும் இடம்பெற்றதோடு ஆம்ஸ்ட்ரோங்கிற்கு அடுத்து நிலவில் கால் பதித்தார். நிலவில் நடந்த உயிர்வாழும் நான்கு பேரில் ஒருவராகவும் அவர் உள்ளார்.
இரசாயனப் பொறியியல் துறையில் கலாநிதிப் பட்டம் பெற்ற 63 வயது அன்கா பவுரியையே அவர் திருமணம் செய்தார். அவர் அல்ட்ரின் நிறுவனத்தின் நிறைவேற்றுப் பிரதித் தலைவராக உள்ளார்.
அல்ட்ரினின் பிறந்த நாளான ஜனவரி 20 ஆம் திகதியே இருவரும் திருமணம் புரிந்தனர். வீட்டை விட்டு ஓடிப்போன வாலிபர்கள் போல உற்சாகமாக இருப்பதாக அல்ட்ரின் குறிப்பிட்டுள்ளார். நீல் ஆம்ஸ்ட்ரோங் நிலவில் கால் வைத்து 19 நிமிடங்கள் கழித்து அல்ட்ரின் அவரை பின்தொடர்ந்தார். 1971 இல் நாசாவில் இருந்து ஓய்வு பெற்ற அல்ட்ரின் 1998இல் விண்வெளி ஆய்வு குறித்து விழிப்புணர்வை ஏற்படுத்தும் ஷேர்ஸ்பேஸை நிறுவினார்.
நீல் ஆம்ஸ்ட்ரோங் 2012 இலும், மைக்கேல் கொலின்ஸ் 2021 இலும் மரணித்த பின்னர் நிலவில் காலடி வைத்த முதல் குழுவில் எஞ்சியிருக்கும் ஒரே நபராக பஸ் அல்ட்ரின் உள்ளார்.
Discussion about this post