அக்குரெகொட பகுதியில் சட்டத்தரணி ஒருவரும் அவரது மனைவியும் சுட்டுக்கொல்லப்பட்ட சம்பவத்திற்கு எதிர்ப்புத் தெரிவித்து, நாடு முழுவதும் உள்ள சட்டத்தரணிகள் இன்று (16) பணிப்புறக்கணிப்பில் ஈடுபடவுள்ளதாக இலங்கை சட்டத்தரணிகள் சங்கம் (BASL) அறிவித்துள்ளது.
சம்பவம் குறித்து விவாதிப்பதற்காக நேற்று (15) பிற்பகல் நடைபெற்ற விசேட பொதுச்சபைக் கூட்டத்தில் இந்தத் தீர்மானம் எட்டப்பட்டுள்ளது. 14 ஆண்டுகளுக்குப் பிறகு கூடிய இந்தப் பிரம்மாண்டக் கூட்டத்தில் சுமார் 3,500 சட்டத்தரணிகள் நேரில் கலந்துகொண்டதோடு, பலர் Zoom தொழில்நுட்பம் ஊடாகவும் இணைந்திருந்தனர்.
இலங்கை சட்டத்தரணிகள் சங்கத்தின் தலைவர் ரஜீவ் அமரசூரிய ஊடகங்களிடம் பேசுகையில், பொதுச்சபையினால் ஏகமனதாக நிறைவேற்றப்பட்ட பின்வரும் தீர்மானங்களை விளக்கினார்:
இந்தக் கொடூரக் கொலையைக் கண்டித்து, இன்றைய தினம் (16) நாடளாவிய ரீதியில் உள்ள அனைத்து நீதிமன்ற நடவடிக்கைகளிலிருந்தும் சட்டத்தரணிகள் விலகியிருப்பார்கள்.
நாட்டில் நிலவும் “கொலைக் கலாசாரத்தை” உடனடியாக முடிவுக்குக் கொண்டு வரவும், மக்களின் பாதுகாப்பை உறுதிப்படுத்தவும் அரசாங்கம் நடவடிக்கை எடுக்க வேண்டும்.
கொலையுடன் தொடர்புடைய நபர்களை உடனடியாகக் கண்டறிந்து கைது செய்யுமாறு பொலிஸார் மற்றும் பாதுகாப்புத் தரப்பினருக்குக் கோரிக்கை விடுக்கப்பட்டுள்ளது.
சம்பவம் குறித்து உறுதிப்படுத்தப்படாத மற்றும் தவறான தகவல்களைச் சமூகமயப்படுத்துவது தொடர்பாக பொலிஸார் மற்றும் சில தரப்பினர் மீது சங்கம் தனது கடும் அதிருப்தியைப் பதிவு செய்துள்ளது.
கடந்த வெள்ளிக்கிழமை இடம்பெற்ற இந்தத் துப்பாக்கிச் சூட்டுச் சம்பவம் சட்டத்துறையினர் மத்தியில் பெரும் அதிர்ச்சியை ஏற்படுத்தியுள்ளது. உயிரிழந்த சட்டத்தரணி மற்றும் அவரது குடும்பத்தாருக்குத் தனது ஆழ்ந்த இரங்கலைத் தெரிவித்துள்ள சங்கம், குற்றவாளிகளுக்கு உரிய தண்டனை கிடைக்கும் வரை தமது அழுத்தம் தொடரும் எனத் தெரிவித்துள்ளது.
இந்தத் திடீர் பணிப்புறக்கணிப்பு காரணமாக இன்று நாடு முழுவதும் உள்ள நீதிமன்ற நடவடிக்கைகள் பாதிக்கப்படலாம் என எதிர்பார்க்கப்படுகிறது.
Discussion about this post