Asia Cup 2023: ‘இந்திய அணி அறிவிப்பு?’.. 

ஆசியக் கோப்பை 2023 தொடருக்கான இந்திய அணி குறித்த அறிவிப்பு வெளியாகியுள்ளது.

இதற்குமுன், ஆசியக் கோப்பை ஏதாவது ஒரேயொரு நாட்டில்தான் நடைபெற்றிருக்கிறது. ஆனால், முதல்முறையாக ஆசியக் கோப்பை 2023 தொடரை பாகிஸ்தானும், இலங்கையும் சேர்ந்து நடத்தவுள்ளது. மொத்தம் 13 போட்டிகள் நடைபெறும் எனவும் இதில், பாகிஸ்தானில் நான்கு போட்டிகளும், எஞ்சிய போட்டிகள் இலங்கையிலும் நடக்கும்.

6 அணிகள்:

இந்தியா, பாகிஸ்தான், இலங்கை, வங்கதேசம், ஆப்கானிஸ்தான், நேபால் ஆகிய மொத்தம் 6 அணிகள் இந்த ஆசியக் கோப்பை 2023 தொடருக்கு தகுதிபெற்றுள்ளது. இந்த 6 அணிகளும் இரு குழுக்களாக பிரிந்து விளையாடும். குரூப் ஏ பிரிவில் 3 அணிகளும், குரூப் பி பிரிவில் 3 அணிகளும் இருக்கும். இதில், இரு குழுவிலும் தலா முதல் இரண்டு இடங்களை பிடிக்கும் அணிகள் சூப்பர் 4 சுற்றுக்கு தகுதிபெறும். இந்த சூப்பர் 4 சுற்றில் முதல் இரண்டு இடங்களை பிடிக்கும் அணிகள் பைனலில் விளையாடும்.

இந்திய அணி இதுவரை 7 முறை ஆசியக் கோப்பையை வென்று சாதித்துள்ளது. தற்போது, ரோஹித் ஷர்மா தலைமையிலான இந்திய அணி கோப்பை வெல்லுமா என்ற எதிர்பார்ப்பு ரசிகர்கள் மத்தியில் நிலவி வருகிறது.

குரூப் ஏ, குரூப் பி பிரிவுகள்:

குரூப் ஏ பிரிவில் இந்தியா, பாகிஸ்தான் மற்றும் நேபால் ஆகிய அணிகளும், குரூப் பி பிரிவில் நடப்பு சாம்பியன் இலங்கை, ஆப்கானிஸ்தான், வங்கதேசம் ஆகிய அணிகளும் இருக்கிறது.

இந்திய அணி அறிவிப்பு:

இந்நிலையில், ஆசியக் கோப்பை 2023 தொடருக்கான இந்திய அணி குறித்த முதற்கட்ட தகவல் வெளியாகியுள்ளது. இந்த பட்டியலில் 15 பேர் இடம்பெற்றிருக்கிறார்கள். இந்த பட்டியலில் இருக்கும் சில வீரர்களை தேவைப்பட்டால் மாற்றிக்கொள்ளவும் வாய்ப்பிருப்பதாகவும் தகவல் வெளியாகியுள்ளது.

ஷ்ரேயஸ், ராகுல், பும்ரா:

இந்த ஆசியக் கோப்பை 2023 தொடருக்கான முதற்கட்ட இந்திய அணி பட்டியலில் ஷ்ரேயஸ் ஐயர், கே.எல்.ராகுல், ஜஸ்பரீத் பும்ரா ஆகியோரின் பெயர்கள் இருக்கிறது. இதில், பும்ரா அயர்லாந்து தொடரில் இந்திய அணிக் கேப்டனாக செயல்பட உள்ளார். அப்போது, அவருக்கு ஏதாவது பிட்னஸ் பிரச்சினை இருந்தால், உடனே ஓய்வுக்கு அனுப்பப்படுவார். அதேபோல், கே.எல்.ராகுல் மற்றும் ஷ்ரேயஸ் ஐயர் ஆகியோர் இந்த ஆசியக் கோப்பையில் அதிரடி காட்டினால் மட்டும்தான், உலகக் கோப்பை அணியில் இடம் பிடிக்க முடியும் என்பதால், இத்தொடர் இவர்களுக்கு மிகமுக்கியமானதாக இருக்கிறது.

15 பேர் பட்டியல்:

இந்திய அணி (உத்தேசம்): ரோஹித் ஷர்மா (கேப்டன்), ஷுப்மன் கில், இஷான் கிஷன், விராட் கோலி, ஷ்ரேயஸ் ஐயர், கே.எல்.ராகுல், சஞ்சு சாம்சன், ஹார்திக் பாண்டியா, ரவீந்திர ஜடேஜா, அக்சர் படேல், யுஜ்வேந்திர சஹல், குல்தீப் யாதவ், ஜஸ்பரீத் பும்ரா, முகமது ஷமி, முகமது சிராஜ்.