பிசாசையும் காதலிக்க வைத்த கலைஞன்.. இயக்குனர் மிஷ்கினின் இன்னொரு பக்கம்.!

தமிழ் சினிமாவில் எப்போதும் ஹீரோக்கள் கொண்டாடப்படுவது மட்டுமே வழக்கம். அதையும் தாண்டி அந்தப்படத்தின் படைப்பாளி கொண்டாடப்படுவது என்பது மிக அரிதான ஒரு விஷயம். அந்த வழக்கம் தற்போது மாறி ஹீரோக்களுக்கு இணையாக இயக்குனர்களும் கொண்டாடப்பட்டு வருகின்றனர். அந்த வகையில் தனது இயக்கத்துக்கு என்றே தனியொரு ரசிகர்கள் பட்டாளம் வைத்திருப்பவர் தான் இயக்குனர் மிஷ்கின்.

தனக்கான இருள் உலகில் தனது கதை மாந்தர்களை உலவ விட்டு அதை அப்படியே படமாக்கி ரசிகர்களுக்கு தனது மனதில் இருக்கும் உணர்வை கடத்தும் ஒரு இயக்குனர் தான் மிஷ்கின். எந்தவிதமான கமர்ஷியல் பூச்சும் இல்லாத இவரது படங்கள் அனைத்தும், பார்வையாளர்களின் மனதில் ஒரு அதிர்வை உண்டு பண்ண தவறியதே இல்லை.

‘சித்திரம் பேசுதடி’ துவங்கி சைக்கோ வரை இவரது இயக்கத்திற்கு இவரே போட்டி. வின்சென்ட் செல்வாவிடம் உதவி இயக்குனராக தனது திரை வாழ்வை துவங்கிய மிஷ்கினை கடந்த 2006 ஆம் ஆண்டு வெளியான ‘சித்திரம் பேசுதடி’ படம் தான் இயக்குனராக தமிழ் சினிமாவில் அறிமுகப்படுத்தியது. அதனை தொடர்ந்து இவர் இயக்கிய ‘அஞ்சாதே’ படம் வழக்கமான போலீஸ், திருடன் கதை தான் என்றாலும் ரசிகர்களுக்கு புது வித அனுபவத்தை கொடுத்தது மிஷ்கினின் இயக்கம்.

இளையராஜா இசையில் மிஷ்கின் வரைந்த ஒரு அழகிய ஓவியம் தான் ‘நந்தலாலா’. ஒரு பயணம் அந்த பயணத்தில் சந்திக்கும் மிகச்சிறந்த மனிதர்கள் என ஒரு கவிதையாகவே இந்தப்படத்தை இயக்கி நடித்து வாழ்ந்திருப்பார் மிஷ்கின். அதனை தொடர்ந்து தமிழ் சினிமாவின் சூப்பர் ஹீரோ சப்ஜெக்ட்டை படமாக்குவதை முதன்முதலில் ‘முகமூடி’ படம் மூலமாக முயற்சித்து பார்த்திருப்பார் மிஷ்கின்.

அதனை தொடர்ந்து தமிழ் சினிமாவில் சேரனை ஹீரோவாக்கி, வயதானவர்களுக்கு இளம்பெண்கள் மீதிருக்கும் சபலத்தை படமாக்கி மிஷ்கின் கவனம் ஈர்த்த இன்னொரு படைப்பு தான் ‘யுத்தம் செய்’. அதுவரை இயக்குனராக மட்டுமே முத்திரை பதித்த மிஷ்கினுக்குள் இப்படி ஒரு நடிகனும் இருக்கிறாரா என ஆச்சரியப்பட வைத்தது அவரின் மற்றொரு படைப்பான ‘ஓநாயும் ஆட்டுக்குட்டியும்’.

இதையெல்லாம் தாண்டி பேய்களை காட்டி பயமுறுத்தி, சிரிக்க வைத்த சினிமாவில் பிசாசை காதலிக்க வைத்ததும் மிஷ்கினின் ‘பிசாசு’. இந்த பிசாசு ரசிகர்களை பயமுறுத்தவில்லை. மாறாக அழ வைத்தது. நேசிக்க வைத்தது. பரிதாபம் கொள்ள வைத்தது. கதாநாயகனோடு ஏன் சேரவில்லை என ஆதங்கப்பட வைத்தது. இதுதான் ஒரு படைப்பாளனாக இயக்குனர் மிஷ்கின் வென்ற இடம். தமிழ் சினிமாவிலும் ஷெர்லாக் ஹோம்ஸ் பாணியிலும் ஒரு படம் இயக்க முடியும் என்பதை மிஷ்கின் நிரூபித்த ஒரு படம் தான் ‘துப்பறிவாளன்’.

கடைசியாக உதயநிதி நடிப்பில் ‘சைக்கோ’ என்ற படத்தை இயக்கி இருந்தார் மிஷ்கின். ஒருவன் சைக்கோவாக மாற இந்த சமூகம் எப்படியெல்லாம் காரணமாக இருக்கிறது. ஒரு தாயின் அன்பு மட்டும் கிடைத்திருந்தால் அவனுக்கு இந்த நிலைமையே ஏற்பட்டு இருக்காது என்பதையெல்லாம் ஒரு சைக்கோ படத்தில் மிகையில்லாமல் படமாக்க மிஷ்கினால் மட்டுமே முடியும்.

மிஷ்கின் படங்கள் பெரும்பாலும் இருட்டிலே படமாக்கப்பட்டிருக்கும். இரவு ஷாட்டுகள் ஒரு மனிதனை பயமுறுத்தி ஆறுதல் சொல்லும் என்பதாலே தனது படங்கள் இருட்டிலே படமாக்கப்படுவதாக மிஷ்கினே கூறியுள்ளார். தன்னுடைய படங்களில் யாரையும் ஹீரோ, வில்லன் என பிரகடனப்படுத்தாத மிஷ்கின், மனிதர்களின் வாழ்வியல் சூழலையும், அதனால் ஏற்படும் விளைவுகள் குறித்து மட்டுமே காட்சிப்படுத்தி இருப்பார்.

இயக்குனராக முத்திரை பதித்த மிஷ்கின் தற்போது நடிகராக அரிதாரம் பூசி பிசியாக நடித்து வருகிறார். இவர் சினிமாவில் நுழைந்ததுக்கு பின்னாடியான காரணம் இதுதான். பல பிசினஸ்கள் செய்து தோல்வியடைந்து சினிமாவில் நுழைந்து இயக்குனராக மாறினார். இசை மீதும் அதிக காதல் உள்ள மிஷ்கின் பாடலாசிரியராகவும், பாடகராவும் இருந்துள்ளார். தற்போது இசையமைப்பாளராகவும் மாறியுள்ளார்.

இப்படி சினிமாவை காதலிக்கும் மிஷ்கின் இன்று தனது 52 வது பிறந்தநாளை கொண்டாடுகிறார். இதனை முன்னிட்டு இவர் தற்போது விஜய்யுடன் இணைந்து நடித்துள்ள ‘லியோ’ பட அப்டேட் வெளியாகுமா என்று ரசிகர்கள் பெரிதும் எதிர்பார்க்கின்றனர். சமீப காலமாக நடிப்பில் பிசியாக இருக்கும் மிஷ்கின் ‘பிசாசு 2’ படத்தினை இயக்கி முடித்துள்ளது குறிப்பிடத்தக்கது.